Pinangunahan ng Municipal Task Force Disiplina ang isinagawang Flag Raising Ceremony ngayong linggo bilang bahagi ng patuloy na pagpapalakas ng pagkakaisa, disiplina, at malasakit sa serbisyo publiko para sa mamamayan ng Infanta.
Sa isinagawang Share to Inspire Program, nagbahagi si Dr. Art C. Libao, Pedya Kamp Founding President ng isang makabuluhan at nagbibigay-inspirasyong mensahe tungkol sa kahalagahan ng pagiging masipag na may kaakibat na perseverance, passion, at purpose bilang mga pangunahing susi sa pagkamit ng tagumpay sa buhay at serbisyo publiko. Binigyang-diin niya na ang tunay na kasipagan ay hindi lamang nasusukat sa sipag sa trabaho, kundi sa kakayahang magpatuloy sa kabila ng mga pagsubok, pagkakaroon ng dedikasyon at pagmamahal sa ginagawa, at pagkakaroon ng malinaw na layunin na nagsisilbing gabay tungo sa personal na pag-unlad at makabuluhang paglilingkod sa kapwa.
Nagbigay rin ng ulat ang tanggapan sa pangunguna ni G. Primitivo Satumba Jr., Chief Ordinance Enforcer, kaugnay ng mga programang nagpapatibay sa kaayusan, disiplina, at kapayapaan sa bayan bilang bahagi ng kanilang patuloy na tungkulin sa pagpapanatili ng kaayusan at kaunlaran sa komunidad.
Sa mensahe naman ng Punong Bayan Lord Arnel L. Ruanto, binigyang-diin niya ang kahalagahan ng pagtutulungan, dedikasyon sa tungkulin, at tapat na paglilingkod publiko. Hinikayat niya ang bawat kawani ng pamahalaan na ipagpatuloy ang pagbibigay ng serbisyong may malasakit, integridad, at responsibilidad upang higit pang mapaunlad ang Bayan ng Infanta.
Infantahin Kaya Natin!
